ইজৰাইলৰ পৰা ভাৰতীয়ক উদ্ধাৰ কৰিবলৈ ভাৰতে আৰম্ভ কৰিলে ‘অপাৰেশ্যন অজয়’
যুদ্ধবিধ্বস্ত ইজৰাইলত আবদ্ধ ভাৰতীয়সকলক ঘূৰাই অনাৰ বাবে বুধবাৰে অপাৰেচন অজয় আৰম্ভ কৰাৰ কথা ঘোষণা কৰে বৈদেশিক পৰিক্ৰমা মন্ত্ৰী এছ জয়শংকৰে।
মুম্বাইত ইজৰাইলৰ কনছুল জেনেৰেল কোবি শ্বোছানীয়ে জনোৱা মতে, বৰ্তমান পেলেষ্টাইনী সন্ত্ৰাসবাদী হামাছৰ সৈতে যুদ্ধত লিপ্ত হোৱা দেশখনত ২০ হাজাৰতকৈ অধিক ভাৰতীয় লোক বাস কৰে। শ্বোছানীয়ে লগতে কয় যে ইজৰাইলত আবদ্ধ ভাৰতীয়ৰ সঠিক সংখ্যা এতিয়ালৈকে জানিব পৰা হোৱা নাই ।
কেৰালাৰ মুখ্যমন্ত্ৰী পিনাৰায় বিজয়নে জয়শংকৰলৈ এখন পত্ৰ লিখি উল্লেখ কৰিছে যে ৰাজ্যখনৰ প্ৰায় ৭ হাজাৰ লোক ইজৰাইলত আছে আৰু তেওঁলোকৰ সুৰক্ষা নিশ্চিত কৰিবলৈ আহ্বান জনাইছে।
ইজৰাইলত আবদ্ধ হৈ থকা ৰাজ্যখনৰ পৰা ৮৪ জন লোকৰ বিষয়ে তথ্য লাভ কৰা বুলিও তামিলনাডু চৰকাৰে এক বিবৃতি প্ৰকাশ কৰে। কৰ্তৃপক্ষই কয় যে আৱদ্ধ ভাৰতীয়সকল অধ্যয়ন, ব্যৱসায় আৰু পৰ্যটক হিচাপে ইজৰাইললৈ গৈছিল।
