৩২ সংখ্যক পথ সুৰক্ষা মাহৰ সফল সামৰণি পৰে শিৱসাগৰত
শিৱসাগৰ জিলা পথ সুৰক্ষা সমিতি আৰু শিৱসাগৰ জিলা পৰিবহন বিষয়াৰ কাৰ্যালয়ৰ উদ্যোগত যোৱা ১৮ জানুৱাৰী তাৰিখৰ পৰা মাহজোৰা বিভিন্ন কাৰ্যসূচীৰে উদযাপন কৰা ৩২ সংখ্যক পথ সুৰক্ষা মাহৰ বুধবাৰে সফলভাৱে সামৰণি পৰে।
৩২ সংখ্যক পথ সুৰক্ষা মাহৰ সামৰণি উপলক্ষে দিনৰ ১০:০০ বজাত উপায়ুক্ত কাৰ্য্যালয়ৰ সন্মুখৰ পৰা জিলা পৰিবহণ বিষয়াৰ কাৰ্যালয়লৈ এক সজাগতামূলক বাইক ৰেলী উলিওৱা হয়। ফ্লেগ অফ্ কৰি বাইক ৰেলীখনৰ আনুষ্ঠানিকভাৱে শুভাৰম্ভ কৰে শিৱসাগৰ জিলাৰ উপায়ুক্ত বিষ্ণু কমল বৰাই।
দিনৰ ১১:৩০ বজাত জিলা পৰিবহণ বিষয়াৰ কাৰ্যালয়ত ৩২ সংখ্যক পথ সুৰক্ষা মাহৰ সামৰণি উপলক্ষে এখন ৰাজহুৱা সভা অনুষ্ঠিত হয়। এই অনুষ্ঠানত অংশগ্ৰহণ কৰি অতিৰিক্ত উপায়ুক্ত চন্দনা বৰুৱাই পথ সুৰক্ষা বৰ্তমানে বৰ প্ৰাসংগিক বিষয় বুলি উল্লেখ কৰি উপস্থিত সকলোকে পথ সুৰক্ষাৰ নিয়মাৱলী পালন কৰি নিজৰ লগতে আনৰ জীৱনো সুৰক্ষিত কৰিবলৈ আহ্বান জনায়।
এই অনুষ্ঠানত অংশগ্ৰহণ কৰি অতিৰিক্ত আৰক্ষী অধীক্ষক ডঃ দেৱজিত নাথে অন্যান্য কাৰকৰ তুলনাত পথ দুৰ্ঘটনাত মানুহৰ মৃত্যুৰ হাৰ অত্যধিক হয় বুলি উল্লেখ কৰি বাহন চলাওঁতে পূৰ্ণ মনোযোগ আৰু দায়বদ্ধতাৰে চলাবলৈ আহ্বান জনায়। তেওঁ অভিভাৱকসকলক সন্তানক দায়িত্ব সহকাৰে তথা সাৱধানতাৰে বাহন বিশেষকৈ দুচকীয়া বাহন চলাবলৈ সজাগ আৰু সচেতন কৰিবলৈ পৰামৰ্শ দিয়ে।
সভাত বীৰ লাচিত বৰফুকন মহাবিদ্যালয়ৰ অধ্যক্ষা দীপালি নেওগে পৰিবহন বিভাগৰ লগতে সংশ্লিষ্ট বিভাগসমূহে গ্ৰহণ কৰা পথ সজাগতা বৃদ্ধিৰ পদক্ষেপসমূহৰ শলাগ লয়।
জিলা পৰিবহন বিষয়া সিদ্ধাৰ্থ শইকীয়াই পথ সুৰক্ষাৰ নিয়মাৱলী সম্পৰ্কে বিস্তৃতভাৱে আলোচনা কৰি সকলোকে এইসমূহ মানি চলিবলৈ আহ্বান জনায়।
অনুষ্ঠানটিত ৩২ সংখ্যক পথ সুৰক্ষা মাহৰ লগত সংগতি ৰাখি ছাত্ৰ-ছাত্ৰীসকলৰ মাজত অনুষ্ঠিত বিভিন্ন প্রতিযোগিতা যেনে চিত্ৰাংকণ আৰু ৰচনা প্ৰতিযোগিতাৰ বিজেতাসকলক পুৰস্কাৰ প্ৰদান কৰা হয়।
