গোসাইগাঁও বিধানসভা সমষ্টিৰ বিপিএফৰ বিধায়ক মাজেন্দ্ৰ নাৰ্জাৰীৰ পৰলোকপ্ৰাপ্তি
বড়োলেণ্ড পিপলছ পাৰ্টিৰ গোসাইগাঁও বিধানসভা সমষ্টিৰ বিধায়ক মআজেন্দ্ৰ নাৰ্জাৰীৰ কোভিড১৯ত আক্ৰান্ত হৈ মৃত্যু হৈছে।
৬৮ বছৰীয়া নৱনিৰ্বাচিত বিপিএফৰ বিধায়ক নাৰ্জাৰীৰ গুৱাহাটী চিকিৎসা মহাবিদ্যালয় আৰু চিকিৎসালয়ত চিকিৎসাধীন অৱস্থাত আজি পুৱা ৫.৫০ বজাত শেষ নিশ্বাস ত্যাগ কৰে।
কোভিডত আক্ৰান্ত হোৱাৰ পিছতে সংকটজনক অৱস্থাত বিধায়ক নাৰ্জাৰী জিএমচিএইচত ভেণ্টিলেশ্যনত চিকিৎসাধীন হৈ আছিল।
স্মৰ্তব্য যে মংগলবাৰে নিশা অসমৰ স্বাস্থ্য মন্ত্ৰী কেশৱ মহন্তই চিকিৎসাধীন নাৰ্জাৰীক জিএমচিএইচত গৈ স্বাস্থ্যৰ বুজ লৈ আহিছিল।
দীৰ্ঘদিন ধৰি জিএমচিএইচত চিকিৎসাধীন হৈ থকা বিধায়ক নাৰ্জাৰীৰ মঙলবাৰে কোভিড টেষ্ট নিগেটিভ আহিছিল যদিও ব্ৰেইন ষ্ট্ৰোক হোৱাৰ বাবে তেওঁৰ স্বাস্থ্য সংকটজনক হৈ পৰিছিল।
১৯৫৩ চনত জন্মগ্ৰহণ কৰা নাৰ্জাৰীয়ে মৃত্যুৰ সময়ত পত্নী, দুটি পুত্ৰ আৰু দুগৰাকী কন্যা সন্তানক এৰি থৈ যায়।
উল্লেখ্য যে ২০০৬ চনত প্ৰথমবাৰৰ বাবে গোসাইগাঁও সমষ্টিৰ পৰা বিধায়ক হিচাপে নিৰ্বাচিত হৈছিল মাজেন্দ্ৰ নাৰ্জাৰী।
