কোভিড-১৯ত আক্ৰান্ত বিধায়ক লেহো ৰাম বড়োৰ মৃত্যু
কোভিড-১৯ত আক্ৰান্ত হৈ চিকিৎসাধীন হৈ থকা ৫৮ নং তামুলপুৰ বিধানসভা সমষ্টিৰ নৱ নিৰ্বাচিত বিধায়ক লেহো ৰাম বড়োৰ শনিবাৰে পুৱা ষ্ট্ৰ’কত আক্ৰান্ত হৈ গুৱাহাটী মেডিকেল কলেজ হস্পিতালত পৰলোকপ্ৰাপ্তি ঘটে।
ইউপিপিএলৰ নেতা তথা বিটিচি প্ৰধান প্ৰমোদ বড়োৱেও তেওঁৰ ফেচবুক পেজত বড়োৰ মৃত্যুৰ বাতৰি সদৰী কৰি শোক প্ৰকাশ কৰিছে।
সংকটজনক অৱস্থাত বৃহস্পতিবাৰে গুৱাহাটী চিকিৎসা মহাবিদ্যালয় হাস্পাতালত ভৰ্তি কৰোৱা হৈছিল
বিধায়ক বড়োক ।
তেওঁ বৃহস্পতিবাৰে পুৱাৰ ভাগত কিছু শাৰীৰিক অসুস্থতাত ভোগাৰ বাবে তামুলপুৰ প্ৰাথমিক স্বাস্থ্য কেন্দ্ৰত কোভিড পৰীক্ষা কৰাত তেওঁৰ দেহত কোভিড ১৯ ৰ সংক্ৰমণ ধৰা পৰিছিল ।
নিশা তেওঁৰ স্বাস্থ্যৰ অৱনতি ঘটাত তেওঁক ইন্টেনচিভ কেয়াৰ ইউনিটত ভৰ্তি কৰোৱা হৈছিল আৰু তেওঁ সংকটজনক অৱস্থাত চিকিৎসাধীন হৈ আছিল।
শুকুৰবাৰে সন্ধিয়া অসম বিধানসভাৰ অধ্যক্ষ বিশ্বজিত দৈমাৰী আৰু বিটিচিৰ এমচিএলএ বিজিত গৌৰা নাৰ্জাৰী, বিজেপি নেতা সোমনাথ বসুমতাৰী গুৱাহাটী চিকিৎসা মহাবিদ্যালয় হাস্পাতালত উপস্থিত হৈছিল আৰু চিকিৎসা মহাবিদ্যালয়ৰ অধ্যক্ষক লগ ধৰি তামুলপুৰৰ বিধায়ক গৰাকীৰ স্বাস্থ্যৰ বুজ লৈছিল।
তামুলপুৰ বিধানসভা সমষ্টিৰ পৰা ইউপিপিএলৰ পৰা প্ৰতিদ্বন্দ্বিতা কৰি অসম বিধানসভালৈ নিৰ্বাচিত হৈছিল লেহোৰাম বড়ো।
